» ‘Api Ma’ohi

Tautai i Ripae, i te fenua ra o Huahine.

ICA-Web — Sat, 10 Sep 2011 00:48:34 +0000

päpa’ihia e Louise Peltzer Groznykh
piahia i roto i te Journal de la Société des Océanistes, n° 72-73, T.37, 1981, ‘api 295-307

Mahana mä’a.
Të na’o mai nei o Mämä ë :
- » Aita tä tätou e ‘ïna’i nö ananahi. »
- » ‘Aiu, haere täua e hï i teie pö. »
- » A fa’aineine i te va’a, e haere ana’e tätou e o Papa ma i Raro mai nö te popo’i i te tahi ma’a ‘öura iti, ei ‘arainu
nä täua nö teie pö. »

Mau te tipi rahi, te tahi mau tapü faraoa iti nö te ‘amu’amu noa ra’a (a)tu i ‘ö mai. Tu’u te va’a i roto i te miti,
rave (i) te hoe, e teie mätou, të haere nei i Raro mai.

Mänino te miti, aitä te mahana i puai roa. Haumärü maita’i. Himenemene noa ïa mätou nä ni’a i te va’a ; e ia
tapae i Raro mai, pa’e tö mätou va’a, e haere ana’e mäua o Mama i uta. O Papa rä, ua haere ïa ona e pa’uma i te
tahi ma’a ‘omoto iti nö te hue, e ‘ohi i te ha’ari nö te kafe, ‘iriti mai (i) te tahi ma’a mä’a iti nö Tapati, a tapü ato’a
mai i te tahi mä’ira nä mäua.

Mäua o Mämä, haere ïa mäua i roto i te ‘änävai, e popo’i i te ‘öura. Ua ‘ite ‘oe i roto pa’i i tera ‘äpo’o iti rahi i
raro a’e i tera tumu purau pa’ari roa.

Nä mua a’e mäua e haere ai i te tahora pape, nä ‘ö mai nei o Mämä ë :
- » Ha’une ana’e (i) te tahi ‘ö’ini nö tä täua ‘öura e hö’ë ha’ape’e nö te ‘ohi mai i te ma’a mape iti nö ‘änanahi. »

Ua ‘ite ihoä ïa oe ë, i ö tätou, ia haere ana’e tö tätou mau mämä i roto i te ‘äfa’a, e mea rahi ïa te mau ‘ohipa e
ravehia mai : e mäpë, e tuvava, e ‘ahi’a, e raufau, …

Tae mäua i te pae pape, hi’ohi’o ri’i e ‘öura anei. Eita e ‘ite maita’ihia, nö te mea, e mea puai roa te pape i te
tahe. Nä’ö mai nei o Mama :
» – A fa’areru ana’e (i) te pape, penei a’e paha ia ë, e haere mai te ‘öura i rapae. »

Fa’areru atu ra mäua. Aita i maoro, të piripiri mai nei te ‘öura i te hiti pape. Pou atu ra mäua i roto i te pape
nö te popo’i i te ‘öura.

Ua ‘ite ’oe, nö të popo’i (i) te ‘oura, e nehenehe ïa tä ‘oe e rave i te hö’ë pareu piro, e tä’amu ‘oe i ni’a i tö ‘oe ‘a’ï, e tape’a ‘oe i tera e piti peho e toe ra o te pareu, a fa’a'eta’eta maita’i, ei reira ‘oe e haere ai e popo’i i te ‘öura, e parau te popa’a ë, e täipu.

Eiaha ra ‘oe e taipu hä noa i te mau mea ato’a. E taipu ‘oe i te ‘öura, nene’i ‘oe i te pareu nö te fa’atahe i te pape ; eiaha ra ‘oe e nene’i ha’apuai roa, ‘a’unei ho’i ïa tä ‘oe tapë hue e roa’a ‘oi’oi mai ai.

Ia pau ana’e te pape i te tahe, e haru ‘oe i te ‘öura nö te tu’u atu i roto i te ‘ö’ini. Mai te peu ë, e hina’aro ‘oe i tä ‘oe ‘öura ia toe mai i roto i te ‘ö’ini, a täpo’i atu ïa i te tahi mau rau’ere rä’au nä ni’a iho, mai te raufau aore ra te rau’ere ‘opaero, nö te mea, eita ïa te ‘öura e patï mai i rapae. la oti tä ‘oe ‘öura i te tu’uhia i roto i te ‘ö’ini, ha’amata fa’ahou ïa i te popo’i….

Te mau ta’o tämau ‘ä’au
‘ïna’i : aliment carné, poisson ou viande, légumes qui donnent du goût à un plat d’aliments fades
‘auperu : plat principal d’un repas
‘ïna’i moana : produits de la mer
‘ïna’i pätë : charcuterie
‘ïna’i tüpa’i : viande de boucherie
popo’i : attraper avec la main ou un avec un instrument
täipu : puiser de l’eau, prendre avec une épuisette
‘arainu : appât
pareu piro : paréo usé
peho : angle, coin

{lang: 'fr'}

Pehe Maeva na te Haga Matakeinaga kia Kiho-Tumu (Fagu Maeva)

ICA-Web — Tue, 23 Aug 2011 00:25:00 +0000

J. Frank Stimson, The cult of Kiho-Tumu, Bernice P. Bishop Museum, bulletin 111, Honolulu, Hawaii, published by the Museum 1933, p 44.

» Kua hakavai a ano ra »
» te Tumu e, »
» Kua hakavai ano ra te Tumu »
» ki raro ake i Havaiki. »

» Ko te Fatu-mehameha, »

» Ko te Tumu o aua haga nui : »
» Ko te Tumu o te Po, »
» Ko te Tumu o te Ao, »
» Ko te Tumu o te Ragi. »
» Ka noho o matakeinaga ki te Ao »
» ka maeva ki te Tumu ra e, »
» A ! Ai ! »
» No te Fakariki… »

» No te Fakariki taua Vai-nui e tatahe »
» ki raro i Havaiki. »

» Ko te Vai-puna-ariki na ; »

» Ko te vai tapu ia no te Atua-nui »

» Ka roaka o roto o taua vai nei : »
» Ko te Nuku o te Po, »
» Ko te Nuku o te Ao, »
» Ko te Ragi o ruga nei, »
» Kia higo ko aua matakeinaga o te Ao, »

» Ka maeva ko te tini fakakite e »
» Ko Kiho te Tumu ra e. »

» Ka noho ko te mano ki ruga i Tua-raki, »
» Ka maeva ki te Tumu ra e ! »

» Ko vau, ko Fariu-a-Makitua, te fakakite atu nei au kia koutou e ko te fakahopega teie o teie
kupu vanaga mahauhau no te fakakite haga i to Kiho-Tumu tupu haga e a na haga haga nui i
fakatupu mai. »
“Kua oti.”

Ta’o tämau ‘ä’au
hakavai = vai = exister, être, rester, demeurer, durer
tumu = racine, origine, cause, raison, fondation, source
fatu = seigneur, maître, employeur, propriétaire
mehameha = effrayant, terrifiant, terreur, frayeur, être effrayé, être terrifié
aua = täua = nous deux, toi et moi,
haga = ‘ohipa = choses
ragi = ra’i = ciel, firmament, chef suprême
fakariki = färi’i = recevoir, accepter
roaka = roa’a = être obtenu, être attrapé
higo = hi’o = regarder, voir

{lang: 'fr'}

Pour que germent les jeunes pousses

ICA-Web — Mon, 18 Jul 2011 20:15:32 +0000

Tous les ans, le département des Arts traditionnels du Conservatoire oriente son travail sur le thème choisi par l’UNESCO. Cette année, il s’agissait des forêts : une occasion unique de sensibiliser les jeunes élèves à la fragilité de la nature. C’est Mamie Louise, trésor vivant de la danse et poétesse inspirée, qui écrit toutes les compositions (‘aparima, pata’u et ote’a) sur lesquelles les apprentis danseurs se sont exprimés toute l’année. Voici en exclusivité ces supports de la vivacité du ‘ori tahiti, dont vous avez pu apprécier la richesse lors du gala du Conservatoire en juin dernier.

Mauriuri peretai I te taitairaa mai e Te tiáraa mai maruapo Matamata aera peretai e I te hiti taha te fenua e Tei faa hirinai taooto te fenua e I te rumaruma o te po Tahiri te matai na te peho Puhihauhau te hupe rii au e O tei tahei te papa fenua Te rumarumapo o maruapo O tei faaheimoe te fenua I te heeraa o te tau e Toro mai nei maruapo Te apurima tahopu ia oe te fenua e Taai mai nei te anave aho ora e Tei tahitahi te aore reva Te matai ora no to oe na haereraa e Tiau ae nei o na rima Ma te heihei ia oe te fenua e Mau ae nei te tiarama maramarama O hina aratai te fenua I roto i te rumarumapo O maruapo	Le grillon chante De manière insistante Alors que la nuit s’installe Jetant un coup d’œil A l’extrémité de la terre Il sentit celle-ci frémir Sous le couvert de l’obscurité Le vent se promène dans la vallée Diffusant doucement sa fraîcheur Jusqu’à couvrir la terre entière La nuit est si dense qu’elle Couvre la terre d’un voile d’illusion Au moment ou le temps s’échappe Alors la nuit étend la main Afin d’étreindre la terre Dans un souffle long Qui éloigne le néant Un souffle qui rappelle ton départ Nos mains se rejoignent Pour t’honorer d’une couronne Et pour brandir le flambeau De Hina, gardienne de la terre Malgré l’obscurité De la nuit (…)
Hià aera o te natura I tona tereraa e Huihui moria i te taha e I te taha reva o te ra’i e Horohoro nu’unu’u tapu avae e Horo nu’u taureà e Uiui to poro avae Pahee taureà te rereraa mai e Mahuta haumoe i te reva e Rere tahopu mai Te matai o to’u aià e Toro to rima a hau te matai Tei faataha na pererau i te reva e Ua rere ua rere te hitiraa o te ra Tutaperepere aera o te tau e Ua tau, ua tau i to’u ai� Tifene parahi i raro e Patu i raro, patu to rima Poa o te tau i to’na hororaa e Pai i te reva paipai ra Hià o te tau te tiàraa mai e Tutaperepere aera taureà e Hià taureà te nu’uraa mai I to’u mau hinaaro rahi e Te horiri toétoé o te ao e O tei tahopu hia mai Te hihi ahi tamahanahana Teie nei ao uri o te tau Tutaperepere aera te natura Ua uri te ra’i Horiri toétoé te fenua Ua unuhiarei te rereraa Oe te amata auahi O te mau hia’ai o te natura I to oe na oraraa e Tei haa mahui Faaateate to oe na a’au O tei haamau te taime e I roto te nu’uraa o te tau e E te tau e, o oe te tià aratai Te tiàrama turama te natura I to oe na haere a e Tei tahopu te mau hia’ai Te amata auahi o te rahu ora e O te aumii aratai i te hau e te natura Na te éa rii moe e Ua marohi ua faaoriorio te fenua E ua haamio aera te natura	La nature chuta En marchant, Se croyant en représentation Aux extrémités du monde, Ses pas se sont emballés. Comme une horde jeune et véloce La plante des pieds frotte Le danseur glisse tel un oiseau Porté par la brise haumoe Vole dans cette direction Sur le dos du souffle de notre terre Etend tes mains et reçoit la paix Qui soutient les ailes Qui volent et s’éloignent vers l’Est Le temps vacilla Et se posa sur ma terre Pour s’y asseoir Les mains battirent le sol En claquant Frappant l’air à plusieurs reprises Le temps vacilla en se levant Le jeune trébucha De son pas hésitant Face à mes désirs Un frisson me traverse Et me saisi tout le corps Les rayons de chaleur De ce monde m’enlacent La nature hésita Le ciel s’est assombri La terre frissonne de froid Le vol s’en est allé Tu ressembles aux brindilles incandescentes Des désirs de la nature Tout le long de ta vie Qui mit à jour tes sens Qui libéra tes entrailles Qui figea le temps Durant sa course Le temps est le guide Le flambeau qui illumine la nature Sur le chemin Qui apaisa les envies Le feu de la nature Les désirs qui conduisent la paix et la nature Par les sentiers cachés La terre s’est desséchée, elle s’est fanée Et la nature se rebiffa (…)
To’u fenua o to’u ia papa O to’u tipaeraa to’u nohoraa To’u fenua te opu o to’u nei ora Te pito o to’u nei tumu Te àà to’u nei hiro� Tei faàamu to’u nei tupu Tei mahora i nià te pāpā Te amaà o te tumu o to’u fenua O tei tahiri i te amaà rima O te rauere manirima o te tumu I te ao reva o te fenua E ua nape mai Te rauere apurima Tei tahiri te matai I te taha o te papa reva O tei faatià te urupoo o te fenua I te vahi teitei o te papa Te pito fenuaTe a’au o te papa Te àà o te tumu Te pou tafare o to’u tiperaa E to’u turiraa I te vahi heeuri O to’u nei fenua Te opu o te papa fenua	Ma terre est mon socle Mon point d’ancrage Ma terre est le cœur de mon être Le centre de mon existence Les racines de mon essence Qui nourrissent ma vie Exposées sur la place publique Les branches de l’arbre de mon pays Où se balancent les rameaux Et son feuillage Remplissent l’espace Les feuilles me saisissent fermement Comme des mains griffées Face au vent qui souffle Depuis la côte vers les cimes Le vent s’est réveillé Au sommet du rocher Où se situe le centre du monde Le cœur de la force Les racines puissantes de l’arbre Les piliers de ma terre d’accueil Où fléchissent mes genoux Tant d’abondance et de générosité Me forcent au respect de ma terre Du ventre de la terre nourricière

{lang: 'fr'}

Rauti tama’i

ICA-Web — Wed, 08 Jun 2011 01:25:49 +0000

I ‘apohia mai e M. Chadourne täne i roto i te ve’a Bulletin de la Société d’Etudes Océaniennes, n°248 septembre 1989, ‘api 113-115

E vana’a aitu, e Tumata’aroa,
Te vana’a a te atua uru ma te ahu,
Te vana’a o te Ari’i,
Te vana’a a Teahio,
Te vana’a a te tüturi ma te paepae,
Te vana’a a te fatu moana,
Te vana’a a te ‘upe’a matatini,
I huria i te ‘ähoa huri fenua,
I täfifia i te tü moana,
Te vana’a a Ruaroroira’i
Te vana’a i ni’a i te ra’i tahua.
E pono i te pono
E pono i te fare ‘aitama’i, ia Ihitea’e, ia Ihitetoa.
Te vana’a a Fanaura toa i te Pü Maruia,
Te vana’a i te to’oto’o ia Ruaiaipao.
Fa’arava i te piripiri mai te ‘aere i tai ë,
I te aro o Aua,
I tai i te avaava.
Tüti’a a’e i te pahu e au teina ri’i ë.
Ei fau tei te upo’o, ei ru’uru’u tei te tua,
Ei taumi tei te aro, ei tatua i te manava taiä.
Ua taiä Petea, taiä Huaroro ia Tö Pörahu, ta’u ‘omore ë.
E ‘ofa’i o Tu o te ‘amiomio,
E ‘oti i te fara ‘aoaoao, tapü i te niurohiti.
E va’a rau e ti’a nei.
O Atea o te pö te vahine, o te ao te tane.
Të ti’a nei Honoura i te Pü Maruia.
Të ‘apo’apo nei i te manava o a taure’are’a.
Të ‘ori nei te heiva o te tama’i.
Të piripiri ma te ‘aere i tä ë,
Ma Tainanu tumata’ata maita’i i te aro o Aua,
‘Iritia i te pahu, e a’u teina ri’i ë,
E Ari’i ho’i i te pua ia uta, e a’u teina ri’i ë.’

Ta’o tämau ‘ä’au
tüturi siège d’honneur sur le marae
‘ähoa huri fenua ouragan
tü moana grand océan
pono conduire
Pü Maruia marae ari’i de Papara
fa’arava assembler
tüti’a redresser
fau couvre chef
ru’uru’u corde, attacher

{lang: 'fr'}

‘ÄRU’I : E AO TE PÖ

ICA-Web — Thu, 26 May 2011 02:12:54 +0000

Päpa’ihia e Jacky BRYANT

Ia he’e te rä i te ‘iriätai, hïtoretore, ‘ïravarava, ‘ura’ura, ‘una’una te ra’i.
‘Äuë te ‘ï’ï maita’i o to’u mata i te raurau o te reva.
Taime poto tïa’i färi’i i te mänihini.
Era a’e mai nei !
Të fa’anu’unu’u au noa mai ra o Pö.
Pö e töna huru : märehurehu, tüheruheru ë ‘ärehurehu roa a’e nei.
Ua ‘iritihia te ‘öro’a, e ao te pö.
E pö ‘iritihia e Ta’urua horo ahiahi.
Mai te morï teitei te huru nö te fa’aara i te fenua ë, ‘eie o Rua, ‘eie o Ana.
Ahiri e hömä, a neva noa a’e na te upo’o i ni’a… ‘eie tö te ra’i, ua ‘ämui mai :
O Mere i te ‘ao’ao, o Pipiri räua o Rehua i te tahi a’e pae,
O Anarua i piha’a atu, o Matari’i i te hiti, te Matau a Maui terä iho atu.
‘Äru’i hanahana… ‘äru’i nö te fa’ahanahana i te ‘öro’a.
E pö re’are’a nö te fa’a'oa’oa, e pö tüpäpa’u nö te mau varua,
E pö ‘ere i te päoa, e pö ara ia vai ‘ara’ara,
E pö tinitini i tö raura’a, e pö rumaruma i te ata täpo’ipo’i.
‘Äru’i tei ‘ï te mana… ‘äru’i nö te mana varua.
E pö ‘itehia nä roto i töna i’oa !
Tïreo te ‘äva’e ‘äpï, horora’a i’a.
Höata te mata ‘ata’ata.
Ma’iri atu ai nau märama, ‘eie Hu’a i te tutura’a huero.
Nä Hotu e fa’anaho i te tanura’a mä’a.
E ‘öpani mai ai Motu te pö pöiri.
‘Äuë te fäna’o : fäna’o tö te fenua, fäna’o tö te tai, fäna’ö tö te reva…
‘Äruì ‘öpere i te maita’i… ‘äru’i nö te ‘atira’a.
‘Äru’i hanahana, ‘äru’i mana, ‘äru’i maita’i.
E haerepö te ta’ata fa’ati’a, e haerepö te ta’ata tämau,
E ‘ärere nö te pö e nä te pö.
Eiaha e ui ë, e ao te pö ?
Tei tö mata noa ra töna varua.
‘ÄRU’I : E AO TE PÖ
Päpa’ihia e Jacky BRYANT

Ta’o tämau ‘ä’au
hïtorere être marqué par de multiples coups
‘ïravarava des marques longitudinales de coups
‘ärehurehu sombre, incertain, crépuscule, être obscurci
märehurehu crépuscule (l’ombre commence)
türehurehu crépuscule (l’ombre s’installe)
maruao aube (ombre du jour)
mära’ora’o aube (les mouches volent)
tätaiao aube (jour du côté rivage)
päoa malchanceux, infructueux
rumaruma triste, sombre, maussade

{lang: 'fr'}

O vai te fatu o te faufa’a tupuna tumu i Pörïnetia faräni ?

ICA-Web — Mon, 02 May 2011 20:27:26 +0000

päpa’ihia e Vahi S.A. Tuheiava-Richaud, ve’a Littérama’ohi n°14,
Ramées de Littérature Polynésienne, Te Hotu Ma’ohi, 2007, ‘api 23 – 25

Aita e uira’a mai te peu aita e mana’ona’ora’a i
muri mai. I tupu mai ai te mana’o uiui e te pe’ape’a
e ‘äpe’e ra i te reira, nö te tahi ïa mea e ‘iterahi-
hia nei i teie mahana, i roto i te peu a te ta’ata,
të haere atu ra i te ‘ü’anara’a. O vai te fatu o te
faufa’a tupuna mä’ohi, i terä e terä vähi, i terä e
terä mata’eina’a, i terä e terä fenua ? Aita tätou e
parau nei i te faufa’a tupuna nö teie tenetere
höpe’a i mahemo a’e nei, e mea huru päpü te fa’anahora’a
o töna parau, mai te pä o Punaru’u i
patuhia i 1846 nö te tama’i i rotopü i te mau nu’u
faräni e te mau mä’ohi, i te tau o Bruat.

Të uiui nei rä te mana’o nö te faufa’a tupuna
tumu o te feiä tumu o te fenua nei, nö te mea ïa
tei roto tätou i te hö’ë tau e te hö’ë fa’aterera’a hau
i patuhia i ni’a i te parau o te ture. Nä te ture, ua
mätau ‘ë ana te taata mä’ohi i töna fa’anahora’a
(Ture Pömare, 1819 ; Ture Tamatoa, 1820 ; Ture
Teri’itaria 1822… e te Ture a te Hau tämarü… e te
Ture a te Hau Repüpirita e rave rau fa’aaveavera’a),
noa atu te ta’a’ore, e pa’epa’e i te ta’ata i
roto i te orara’a tïvira e te parau ti’a. Nä te ture e
fa’atïtï’aifaro i te ‘ohipa tano ‘ore e te hahi ia tu’uhia
taua mea ra i mua i te feiä nä rätou te reira
tuha’a ‘ohipa e ha’apa’o. Ia ‘ite mai rä tätou, e
‘ohipa te ture i tei tu’uhia i roto i töna rima e
räve’a täna nö te pähono. Ia ‘ore ana’e, e’ita te
ture e ha’uti. Të vai noa ra paha te tahi mau vähi,
i roto i te parau nö te fatura’a i te faufa’a tupuna
mä’ohi, aita tä te ture e parau fa’aotira’a päpü
maita’i, nö te tahito o taua mau faufa’a tupuna ra
e parauhia ra, e’ita e tano ia hi’ohia mai te tahi atu
mau tao’a nö teie nei tau. E uira’a ä teie.

Te tahi atu tumu i pe’ape’a ai te feruriraa, te
taura ïa e tä’ai ra i te ta’ata mä’ohi e töna parau e
vai ra i roto i te faufa’a tupuna tumu. Nö te mä’ohi
tumu, e türu’i o ia i töna iho parau i ni’a i te
faufa’a tupuna tumu e fa’a'ite ra i töna iho e, töna
hïro’a tumu nö ‘ö roa mai i tö tahito ra. ‘Ei hi’ora’a
: aita ona i atea i te mau täpa’o i riro ‘ei te’ote’ora’a
nöna, iona iho. Noa atu ä ïa tei ni’a teie
mau täpa’o (mai te piri) i te vähi i fatuhia e te
hö’ë ‘öpü ta’ata, o roto i te hi’ora’a a te ta’ata nö
te reira fenua, e tä’amura’a töna i taua mau täpa’o
ra. E’ere taua mau täpa’o ra nö te hö’ë noa pupu
ta’ata, nö te tä’ato’ara’a ra. E parau ‘ë tö te mau
ta’ata fatu fenua e, e parau ‘ë tö te fatura’a i taua
mau täpa’o ra.

Të vai fa’ahou ra te tahi atu tumu : i teie tau
‘äpï, te tämonihia nei te faufa’a tupuna tumu. Ua
riro te mau ‘ohipa e ö i roto i te parau o te faufa’a
tupuna ‘ei ‘imira’a moni nä te feiä o teie tau.
E’ita te reira e maerehia, inaha, ‘aua’e taua mau
faufa’a ra i mauhia mai i ‘ore ai te tahi pae e
topa i roto i te orara’a fifi e te ‘ere.

Nä teie uira’a e fa’a'ite mai nei i te vaira’a o te
ferurira’a (aore ra te ha’apa’o-’orera’a !) o te ta’ata
nö teie tau i mua i te parau o te muriataura’a,
aore ra te ‘ananahira’a o te faufa’a tupuna mä’ohi.
E tano ia ui-ato’a-hia : te faufa’a tupuna nö
tahito roa mai, te mä’ohi ana’e të tano i te fatu,
aore ra tei roto töna parau i te parau nö te mau
faufa’a tumu ato’a o te ao nei. Te aura’a ra, ia
‘ore te mä’ohi iho e ha’apa’o fa’ahou i taua faufa’a
ra i teie tau, noa atu te huru o te mau tumu
e ha’amäramarama mai ia tätou i taua ha’apa’o-
‘ore-ra’a ra, e vaiiho noa anei i te reira ia ‘ino roa
atu, ia päpararï roa atu, ia marau roa atu, aore e
hua’ai tamari’i nö muri nei e ‘ite fa’ahou i te
‘ohipa i vaiihohia mai e te mau tupuna ?

Të ‘itehia nei, nä roto i te ’ana’anataera’a o
te tahi pae o tätou i te tau’ara’a i te faufa’a
tupuna tumu, te vaiiho-noa-ra’a te tahi atu pae
o tätou i taua faufa’a ra ia ‘ore e, peneia’e, ia
mou, ’oia ho’i, ia ’ore tö ’ananahi ia ’ite i töna
parau.

O vai mä teie e täu’a nei, e ha’apa’o nei i te
parau o te faufa’a tupuna, aore ra o vai mä teie
e ’ore nei e ’atu’atu ? E aha te tano i te rave ia
vai taui’ore noa e ia vai maoro te reira i roto i te
tau, eiaha ia ’ore e, eiaha ia tauihia töna huru e
töna höho’a ?…

uiui : 1)bourbouille, 2) éruption cutanée,
3) ques tionner de manière répétée, poser de
nombreuses questions
ha’avä uiui : juge d’instruction
mä’itira’a uiui mana’o : référendum
uiuira’a : questionnaire, interrogation, interview
’ui’ui : 1) difficile pour la nourriture, 2) personne
habile et soigneuse, 3) gratter, frotter

{lang: 'fr'}

‘Ä’ai nö Puna’auia

ICA-Web — Thu, 17 Feb 2011 21:16:46 +0000

päpa’ihia e Joseph TEURI, piahia i roto i te HEI PUA RI’I
(Parau ri’i ‘atohia mai nö roto i te mau puta i tata’u na i te Fare Väna’a)

I terä ra tau, të vai ra te hö’ë ta’ata, o Puna töna
i’oa. E ta’ata ‘oia nö te mata’eina’a ra o Hiti. O Hiti,
o te i’oa ïa o Puna’auia i te tau tahito. Ua tere ti’a
atu o Puna i Ra’iatea. E tere ori haere ho’i töna. Ia
tae i te tau e ho’i mai ai ‘oia, fa’aru’ehia ihora e te
pahï ; e te i’oa o taua pahï ra, o Hotutahi ïa. Horo
haere noa a’e nei o Puna nä tätahi, i te tahi pae ë i
te tahi pae, nö töna hina’aro i te ho’i mai i Tahiti
nei.
Të hi’o noa ra te honu fa’a'amu a te ari’i i teie
huru o Puna, e të ‘ite nei ‘oia i töna pe’ape’a. Ua
parau atura teie nei honu ia Puna ë :
- E aha teie tä ‘oe e ‘oto nei ?
Pähono maira o Puna ë :
- Të hina’aro nei au e ho’i i tö’u ‘äi’a, i Tahiti ; aita
rä ho’i tä’u e räve’a, ua fa’aru’ehia vau e te pahï.
Pü’oi atura te honu ë :
- Eiaha e ‘oto fa’ahou. Nä’u ‘oe e ‘äfa’i. A ta’uma
a’e i ni’a i ta’u tua, e rëreva täua i teienei.
Tere mai nei o Puna e te honu, e täpae iho nei i
tahatai, i Hiti, i te vähi i parauhia ra ë : o Teoneuri,
o ‘Öfa’i Pi’ipi’i, te tahi i’oa o taua vähi ra. Ua nä’o
atura te honu ia Puna ë :
- Ua tae ‘oe i tö ‘oe fenua, a pou rä !
Pou mai nei Puna, mai ni’a mai i te tua o te honu.
E aha te ‘ohipa täna i rave ? Ua täpüpü ‘oia i nä pererau
e maha ato’a ra o te honu.
- O tä ‘oe ïa rave ia ‘u ! o te reo o te honu i te
paraura’a atu ia Puna. Ua rave maita’i ho’i au ia ‘oe.
Ua ‘äfa’i roa mai i tö ‘oe fenua, mai tä ‘oe i hina’aro.
‘Atirä noa atu rä ! Aita e pe’ape’a, nä ‘oe rä e ‘ite
atu i tö ‘oe ‘ati.
Teie honu, mai tä tätou i ‘ite i te ‘ömuara’a o teie
‘ä’ai, e honu teie nä te ari’i. E honu manamana.

Enö reira, ua riri roa te fëti’i ari’i o te fenua, i te ‘ohipa
‘ino i ravehia e Puna. O ‘Inoarii te i’oa o te ari’i e fa’atere
ra i te mata’eina’a ra o Hiti, i terä ra tau. Ua fa’aue
atura i töna mau ta’ata, e ‘imi ia Puna e ia taparahipohe-
roa-hia ‘oia.
Ua horo haere noa ihora o Puna i terä fa’a ë i terä
fa’a, ë tae roa atura ‘oia i ni’a i te ‘äivi ra i parauhia ra
ë : o Teivirairaitaharara. I ni’a i taua ‘äivi ra, të noho ra
te tahi nau ta’ata fa’a'amu pua’a : o Pa’ateve mä tö räua
i’oa. Nö teie horo-haere-noa-ra’a o Puna, e po’ihä iti
rahi roa töna. ‘Ite atu nei ‘oia i te hö’ë ma’a maia’a
pua’a rahi, të fa’a'ote ra i töna mau fanau’a. Nö te rahi
o te po’ihä, aita ho’i e pape tö taua vähi ra, fa’afätata
roa atu nei o Puna i te maia’a pua’a, nö te ‘ote i te ü.
Ti’a tä’ue a’e nei te pua’a, peretete atu ra o Puna. He’e
iho nei te ‘ävae, a topa atu ai ‘oia i raro roa i te ‘äivi.
I reira, të ‘ite nei ‘oia i te hö’ë ‘äpo’o pape, e ‘äpo’o
pape iti na’ina’i roa rä, eita e ti’a ia täipu. Aita ato’a o
Puna i ui i te parau, tei raro noa ihora te aro nö te inu
i te pape, nä ‘ävae tïroroa i muri ‘e, nä rima i mua. Të
inu noa ra ‘oia i te vai, i ro’ohia mai ai e te ‘aito.
Tä’amu’amuhia ihora nä ‘ävae e te rima nöna ra i te
taura rö’a. Të ‘ite nei o Puna ë, ua mo’e roa te taura rö’a
i roto i nä mero e hä nöna ra, eita e mahuti ‘ia tätara. I
reira ‘oia i te anira’a i te ‘aito e fa’aora iäna.
- Eita vau e fa’aora ia ‘oe, ‘oe i hämani ‘ino i te
honu. ‘Ia ‘ite mai ‘oe ë, o vau iho nei taua honu ra.
Parauhia a’e nei taua vähi ra ë, o Punaru’u, nö te
mea i reira o Puna i te ru’uru’ura’ahia. Amohia atu ra o
Puna i tahatai e ‘eu ai. E nö te mea ho’i ë, ua ‘auihia
‘oia, i pi’ihia ai teie nei mata’eina’a ë, o Puna’auia. Të
ta’a nöna ra, ‘äfa’ihia atura ïa i roto i te ava e fa’aru’e
ai. Mai reira mai i parauhia ai ë : te ava o Ta’apuna.
‘Äre’a nä mata ra, ua te’ahia ïa i te rä’au, ‘äfa’ihia atu ai
i roto i te fa’a ; i pi’ihia ai teie fa’a ë, o Mätäti’a.

’aui : négligent
’aui : gauche (opposé à droite)
’aui : envelopper et conserver ou cuit au four
hä : quatre
hä : incantation pour guérir une personne empoisonnée
te’a : linteau, poutre tranversale, solive
te’a : flêche
ru’u : méthode de pêche
ru’u, ru’uru’u : lier, attacher
ru’uru’u : lien, corde,

{lang: 'fr'}

Hoho’a parau ‘iritihia mai roto mai i te Ve’a iti

ICA-Web — Thu, 27 Jan 2011 20:36:36 +0000

Litterama’ohi – Ramées de Littérature Polynésienne – Te hotu ma’ohi, n°2, titema 2002

Pur ümu nï ‘ au
Ia rehu te fare
Purümu nï ‘au !
Ia hina pü’ävere te
papa’i
Purümu nï ‘au !
Ia topa e pehu
Purümu nï ‘au !

Ia ‘avae teretere,
Purümu nï ‘au !
Ia pa’o te tohe piripou,
Purümu nï ‘au !
Ia turituri te tari’a,
Purümu nï ‘au !

Purümu nï ‘au !
Purümu nï ‘au !
Purümu nï ‘au !
‘Ahehe i te arara’a o te
Rä !
Purümu nï ‘au !
‘Ahehe i te topara’a o te
Rä !
Purümu nï ‘au !
A fa’aea na i te
mäniania,
Purümu nï ‘au !
A fa’aea na,
E auahi tö ‘oe vaira’a !

A’ ai i t e hau
A toro na i tö tari’a,
Ia hï täpere te fetu
I te moana o te pö,
Ia ta’i mämü te reva,
A toro na i tö tari’a
E vivo tä ‘oe e fa’aro’o,
E ta’i vivo navenave
mau,
E muhu nö te varua :
» A ‘ai i te hau … »

A huri na i tö mata
I te maru o te märamarama
Ia arata’i oia i tö haere’a
Nä te ‘e’a apiapi
A huri na i tö mata
I te ra’i tuatini,
E reo tä ‘oe e fa’aro’o,
E poro’i iti teatea :
» A ‘ai i te hau… »

A ‘ai i te hau
Ei mä’a tumu nö tö
orara’a,
Ei niu nö tö va’a
mata’eina’a,
A ‘ai i te hau
Ia mäha tö hina’aro
I te here e te aroha,
A ‘ai i te hau.

Të pi ‘ i nei t e
pö
Ia ta’i te manu
I te tu’ira’a o te pö,
Ua mate ïa te ta’ata
Nö tö’u ‘äi’a.

Ia ura te ata
I ni’a i te ava roa,
Ua rere ïa te varua
I te ra’i pöiri.

Nö’u nei rä te mo’otua,
Nähea ho’i au i teie nei
I te ätea o tö’u nei ‘äi’a ?
Nähea ho’i au i teie nei,
E të pi’i mai nei te pö…

Ta’o tämau ‘ä’au
‘ ahehe : bruissement, bruit de la pluie sur les toits de nï ’au
‘ ahï : bruire, produire un bruissement
hi na : variété d’araignée
pü’ äv er e : moisi
nï naemoa : moisissure
hï t äper e : descendre violemment comme une cascade
‘ äi a : pays natal, patrie

{lang: 'fr'}

TE TÄRENA MÄ’OHI – Tuha’a 1 -

ICA-Web — Thu, 04 Nov 2010 00:49:14 +0000

‘Ïritihia mai roto mai i te HEI PUA RI’I
(parau ri’i ‘atohia mai nö roto i te mau puta i tata’u na i te FARE VÄNA’A), ‘api 213 – 217

I te tau tahito ra, e’ita te ta’ata tahiti e tai’o i te mau mahana, e tai’o rä rätou i te mau pö. E ‘ohipa ‘öhie a’e teie, inaha, e mea huru ‘ë te ‘äva’e i te mau pö ato’a, ‘e töna ti’ara’a i ni’a i te ra’i e mea ‘ë ato’a.
Hö’ë ä rä te huru o te rä i terä mahana ‘e i terä mahana ‘e e mea ‘ë iti roa a’e te tauira’a o töna ti’ara’a i ni’a i te ra’i.
‘Ua topa te feiä tahito i te i’oa i ni’a i te pö täta’itahi o te ‘äva’e, ‘oia ho’i e piti ‘ahuru ma va’u i’oa tö te mau pö, mai te ‘äva’e ‘äpï ; ‘o Tireo te i’oa o te äva’e mätämua ‘e tae roa atu i te ‘äva’e ‘äpï i muri a’e.
I te mana’o a tö tahitö, të vai ra te pö maita’i nö te tautai ‘e te pö maita’i nö te tanu i te mä’a tupu ‘e te piti ‘ahuru ma hitu o te pö, ‘o Täne te i’oa, e pö maita’i ïa nö te rave i te ‘ohipa huru rau.
I roto i te motu täta’itahi tei nohohia e te mä’ohi, ‘ia tautai rätou, e hi’opo’a rätou i te huru o te horora’a i’a ‘e e tämau ‘ä’au rätou i te reira, ‘ia au i te tauiuira’a o te ‘äva’e i te mau pö ato’a.
Te i’oa tahiti nö te mau pö o te ‘äva’e :
E rave rahi täpura i’oa pö i päpa’ihia i muta’a ra, ‘ua mä’iti mai ra te Fare Väna’a e toru täpura tei nene’ia i roto i te ve’a » Journal of the Polynesian Society « i te matahiti 1928, teie ïa :
- ‘a tahi : te täpura a te tävana tuiro’o ‘o Tati nö Papara, ‘oia ‘o Te’ura’itera’i i Täputuära’i. Nä täna hinarere, ‘o Marauta’aroa-i-Tahiti, ari’i vahine nö Tahiti i höro’a ia J. Frank STIMSON (të parauhia ‘o Üä täne) nö te päpa’i ;
- ‘a piti : tä Paruparu ‘oia te tamaiti a te tävana Haumäteata o Mai’ao (Ile de Saunder).
- ‘äre’a te toru o te täpura, nä te mau ti’amana o Tahiti ‘e ‘o Mo’orea i höro’a mai :

1 – TIRIO 1 – TIREO 1 – TIREO
‘Ua pata te marama, e marama ‘äpï ïa ‘e ‘ua noho te marama i ni’a i te patu. ‘Ua ti’ati’a te i’a ; te mau huru ato’a. ‘Ua horo te ‘ï’ihi i täua pö nei. Te huru o te täi’ara’a ra : e tä’upe’a ïa. E färiu rä te ‘auaha tëtë i ni’a. E pö i’a roa ïa.
2 – HIRO-HITI 2 – HIRO-HITI 2 – HIRO-HITI
‘Ua hiti te marama, ‘ua fa’a'ite i töna huru, ‘ua hiti ato’a te i’a ‘e ‘ua ‘öti’ati’a te mau huru ato’a ; ‘ua horo te manini i taua pö nei. Te huru o te täi’ara’a ra, e hï ïa. ‘O te pö teie i fänau ai ‘o Hiro.
3 – HÖATA 3 – HÖATA 3 – HÖATA
‘Ua ‘ata te marama, të ‘itea a’e ra e e horo atura i töna ata. ‘Ua horohoro te i’a ‘ïtere, te i’a pa’a ‘e të ne’e ato’a i taua pö nei. Te huru o te täi’ara’a ra, e hï ïa ‘e e ramarama ato’a i tua i te pao’e, te ‘örare, te maunauna, te va’u ‘e te ‘ömuri.
4 – HAMIAMA-MUA   4 - HAMIAMA-MUA
4 – HAMIAMA TAHI
‘Ua hä’ati’ati te i’a, ‘ua ha’apupu haere. E pö püai teie nö te ‘iteara’a te i’a. Te huru o te täi’ara’a ra : e rama ïa ‘e nä roto atu nei ïa i te a’au, te ramarama ‘e nä ni’a ra i te va’a, e nï’au ïa te rama.
5 – HAMIAMA ROTO 5 – HAMIAMA ROTO
5 – HAMIAMA ROTO
‘Ua hä’ati’ati ä te i’a, ‘ua ha’apupu haere, te tahi ato’a pö püai teie nö te ‘iteara’a te i’a ; te huru o te täi’ara’a ra, e rama ïa, e tïa’i rä ‘ia topa te marama i raro, ‘oia ho’i ‘ia pouri, ‘ei reira ïa e ha’amata atu ai i te ramarama nä ni’a i te a’au. E ‘öura miti ïa te i’a ‘e te ‘oiro ; e hï-ato’a-hia te uhu ‘e te tarao i teie pö nei.
6 – HAMIAMA-MURI 6 – HAMIAMA-MURI
6 – FA’AOTI-HAMIAMA
‘Ua hä’ati’ati ä te i’a ‘e ‘ua ha’apupu haere, te tahi ato’a ïa pö püai teie nö te ‘iteara’a te i’a. Te huru o te täi’ara’a ra : e rama ïa, e tïa’i ato’a ïa ‘ia topa te marama ‘a ramarama atu ai nä ni’a i te va’a. E mü ïa te i’a i taua pö nei ‘e te vete ‘e te ume ‘e te tahi atu ä. ‘Ei roto i te mau ‘afä o te mau horo avaava ri’i e hi’o ai.
7 – ‘ORE’ORE-MUA   7 – TAMATEA MUA
7 – ‘ORE’ORE TAHI
E pö ha’amo’era’a teie nö te i’a, e ‘itea-varavara-hia ïa, mai ‘Ore’ore-mua ‘e tae roa atu i Tamatea. ‘O nä pö teie i parauhia ë e tau pö pupara’a nö te i’a, ‘äre’a ra, e horo te mü i taua pö nei ‘ia tae i te marama ra i Tema. E ‘upe’a ïa te tautai ; e färiu te ‘auaha o te tëtë i ni’a ‘e i te tapera’a o te rä, ‘ua topa ïa te ‘upe’a i raro i te tai, ‘a tïa’i atu ai i te nanura’a miti.
8 – ‘ORE’ORE MURI 8 – TAMATEA ROTO
8 – FA’AOTI-’ORE’ORE
E pö ha’amo’era’a ato’a teie nö te i’a, e ‘itea-varavara-hia ïa. E pö to’erau ïa, i te marama e tupu ai, ‘e nö reira, e pö i’a ‘ore ïa. Terä ra, e horo ato’a ïa te mü i teie nei pö. E ‘upe’a ïa te tautai.
9 – TAMATEA 9 – TAMATEA-MURI
9 – TAMATEA
‘Ua türamarama te marama, ‘ua ti’a mai te i’a rarahi nö te höhonu i ni’a a’e i te one ; ‘ua hiti ato’a te to’au, te täea, te mäene, te ‘auhopu ‘e te mau i’a ato’a i teie nei pö. E ‘upe’a ïa te tautai, e fariu rä te ‘auaha o te tëtë i ni’a ‘e i te tapera’a ato’a o te rä, ‘ua topa ïa te ‘upe’a.
10 – HUNA 10 – HUNA 10 – HUNA
‘Ua huna te mata o te i’a, ‘ua ta’oto. E pö i’a ‘ore roa ïa, ‘eiaha ïa e täi’a i taua pö nei ‘a ‘ati i te rohirohi.
11 – RAPU   11 – ‘ARI 11 – RAPU
‘Ua rapu te mämari o te i’a. E pö i’a ‘ore ïa, terä ra e pö hau roa ïa nö te mäene. E ‘upe’a ato’a te tautai ; ‘ia taha te rä ‘a haere ‘a täumi i te ‘upe’a, ‘a fa’afäriu ato’a i te ‘auaha o te tete ‘upe’a i ni’a.
12 – MAHARU 12 – MAHARU 12 MAHARU
‘Ua horo te i’a e ueue i te huero. E pö i’a ‘ore roa ïa, ‘eiaha e täi’a i taua pö nei ‘a ‘ati i te rohirohi. ‘O te fa’ahe’e pu’era’a ïa te huero o te mau i’a e parauhia nei.
13 – HU’A 13 – HU’A 13 – HU’A
‘Ua ‘itea te i’a hu’a rau. ‘Ua horo tä’iri te i’a i te marama e horo ai. E pö i’a roa ïa i taua marama ra ; e horo te mü ‘e te tuhara i taua pö nei. E ‘upe’a te tautai ; e färiu ä te ‘auaha tëtë ‘upe’a i ni’a, ‘e i te ahiahi te mü ‘e i te ‘a’ahiata te tuhara.

(pü’oira’a)

Ta’o tämau ‘ä’au

tärena : vient de l’anglais calendar : calendrier
pö : aveugle
pö : le monde des dieux et des esprits
pö : antiquités, temps primordiaux, temps inconnus
pö auahi : enfer
pö tämära’a : purgatoire
pö tüpapa’u : nuit des revenants
pö re’are’a : nuit joyeuse, agréable
pö rumaruma : nuit sombre et lugubre
pö tinitini : nuit noire
pö tinitini : nombre d’une grandeur infinie

{lang: 'fr'}

Tö Mahine fa’aipoipora’a i te vahine

ICA-Web — Thu, 21 Oct 2010 07:51:49 +0000

Tö Mahine vahine metua, o Perera ïa, tuahine nö Tapoa. Ua fa’aipoipohia räua i te peu ‘etene ra. Ari’i ‘aito tuiro’o o Tapoa i taua ‘anotau ra, mai ia Mahine mä ato’a. Ua fänau tama Mahine i täna vahine ia Perera, e tamahine, o Tuaitara te i’oa. Ua pärahi haere noa Mahine i Ra’iatea, i Taha’a e i Borabora mai te peu o te huiari’i i te ‘etenera’a ra.
Ia fa’aro’o ra Mahine i te ro’o ë, të tama’i ra töna tua’ana o Tenania räua o Teuhe, haere ‘oi’oi mai ra o ia i Huahine e tauturu. Raverahi tö räua ‘arora’a ia Teuhe mä, e pau roa a’e ra räua e tö räua ta’ata. Ia noa’a te hau ia Teuhe ra, höro’a atu ra i täna tamaiti ra ia Teurura’i. Ua tauturu te feia ‘aito ia Teuhe ma te mana’o ë, nö Teri’itaria mau ä te hau ia noa’a mai. Inaha, ia noa’a ra, höro’a atu ra i täna iho tamaiti ; ua fa’a’ere atu ra ia Teri’itaria, i te ari’i fänau ra.
E toru atu ra patu i Huahine nei, i rahi roa ai te ha’amani’ira’a toto i te tau i muri a’e.
Ho’i atu ra Mahine i töna fenua ra i Taha’a, ma täna vahine, ‘e te tamahine, e pärahi noa atu ra i reira.
I tö Mahine pärahira’a i Taha’a ra i tupu ai te tama’i, o Tapoa te hö’ë pae, ‘e o Fa’anui i te tahi pae. Ua aroha atu ra Tapoa i tö Ra’iatea i fa’au’au’a-roa-hia e tö Fa’anui. Ua tauturu Mahine i töna tau’ete, o ia e töna ra mau ta’ata ‘aito.
E tama’ira’a roa, e ta’ata rahi tei pohe. Ua pau roa atu ra ïa räua tö Fa’anui, e ora a’e ra tö Ra’iatea i te feia i fa’ahepohepo i ni’a iho ia rätou ra.
Ua täparu mai ra tö Fa’anui ia Teurura’i e töna metua ra ia Teuhe, e haere atu i Raro e tauturu ia rätou i te tama’ira’a atu ia Tapoa, ia tïtï fa’ahou Rai’atea ia rätou ra.
Fa’atere atu ra Teuhe i Raro i Ra’iatea ma te nu’u rahi. Ia hi’o a’e ra Tapoa räua o Mahine, ua mata’u iho ra, e horo ‘ë atu ra i mua ia Teuhe. Ua a’ua’u atu ra Teuhe ia räua, e tae roa atu ra i Borabora. Ua auraro ato’a mai ra tö Borabora ia Teuhe, e ua huru hanahana roa o ia.
Ari’i fänau ho’i Mahine nö Huahine, ‘e ia hi’o o ia ia Teuhe i te upo’oti’ara’a, ua ‘äpiti mai ra iana iho ia Teuhe. Të täponi haere ra Tapoa i ni’a i te mou’a i Rai’atea, o të taparahihia.
Ia ho’i mai ra Teuhe i Ra’iatea, ho’i huna atu ra Tapoa i Borabora, ‘e ua ha’aputuputu fa’ahou i te hö’ë nu’u nö roto i töna iho fëti’i e töna mau hoa i Fa’anui ra, ‘e ua ho’i ‘oi’oi mai ra i Ra’iatea. Ro’ohia mai ra tö Huahine e Tapoa, tei ‘Opoa. Ua ‘aro iho ra Tapoa ia rätou, e ‘otai, e pau rahi tö Huahine, e ua roa’a fa’ahou mai ra ia Tapoa töna hau i Ra’iatea ‘e i Taha’a.
Nö te vare a Teuhe i rahi roa ai te pau o tö Huahine. Nö Fa’anui Teuhe, i te pae’au o te metua vahine, e ua ‘ämui ato’a o ia i tö Fa’anui e tö Huahine i töna ra nu’u. E ua taparahi-ato’a-hia tö Huahine ‘e tö Fa’anui i ni’a iho i tö rätou iho pahï. Ua fa’aorahia ra Teuhe e o Mahine e Tapoa, ‘e nä na i uta mai ia räua i Huahine nei.
O te tama’i ana’e o te mea hina’aro i te ‘etenera’a ra. Aita Teuhe räua o Mahine i maoro i Huahine, ua tupu iho ra te tama’i. O Tenania räua o Mahine tei tama’i atu ia Teurura’i, ia noa’a te hau. Rave rahi te ‘arora’a, e rave rahi te ta’ata i pau i te pohe, tö te tahi pae, ‘e tö te tahi pae, aita ra Teurura’i i pau ia räua, aita te hau i noa’a.
Ro’ohia iho ra Teuhe i te pohe, ‘e aita i roaroa, pohe ato’a atu ra Teurura’i, e naupä noa mai ra ia räua tö räua hau.

Ta’o tämau ‘ä’au
Roa’a : être obtenu, être attrapé
Na’uma : être obtenu, être attrapé
Naupä : (être obtenu, être attrapé) être gagné
Nau’a : (être obtenu), devenir la possession de…, être atteint, titulaire
Noa’a : (être obtenu, être attrapé), être acquis
Raumä : (être obtenu), réussir
Reina : (être obtenu), être accompli
‘Ötai : combat naval
Patu : subdivision d’un district, clan, classe, parti, mur de pierre

{lang: 'fr'}