Hiro’a n°151 – E reo to’u : To ù fare au
E reo to’u
Service du patrimoine archivistique et audiovisuel (SPAA) – Te Piha faufa ‘a tupuna
To ù fare au
Unaùna pōraò òre no to ù pāreu,
Hii pūmāhana no ta ù moemoeā,
Maru hau pūvaìvaì no taù tino,
Nohoà tumu no to ù hiroà,
Niu papa no to ù iho,
Rohipehe āruerue no to ù vaerua,
Aià tumu no to ù âià,
Utuāfare māhere òre no to ù fenua,
Māòhi no to ù māòhi,
Huru no to ù huru,
Ite haamere òre no mua ra e a muri noa atu,
Fare māòhi e,
O òe ihoā òe, aita atu ai !
Aore ā i parau ua ōrero mai òe.
Aore ā i hīmene ua tārava mai òe.
Aore ā i àhu ua tīhere mai òe.
Aore ā i māa ua ahimāa mai òe.
Aore ā i înaì ua tāhana mai òe.
Aore ā i haamiti ua tāpē mai òe.
Aore ā… o òe na, o òe na vau !
I te ātea ê roa ra ua pūrero mai to reo :
« Haere mai rā i te fare nei ! »
Māòhi no to ù māohi,
Huru no to ù huru
Ite haamere òre no mua ra e a muri noa atu,
Fare māohi e,
O òe ihoā òe, aita atu ai !
Fare tāòto, fare tāmāa,
Fare ahimāa, fare fārii,
Fare pōtee, fare haupape,
Fare hauparu, fare taupee.
Rāau no te fenua,
Tāpoì no te fenua, pāpaì no te fenua,
Vauvau no te fenua.
Tāòto ihoā, tāmāa ihoā.
Ite haamere òre no mua ra,
E a muri noa atu.
Terā ra pēùe iti,
Neea te ihu e te raò i te ao,
Pūâvereverea i te pō.
Fare māòhi e,
O òe ihoā òe, aita atu ai !
I no reira anaè mai,
Hōhoì anaè na e terā ra Māòhi.
Nā na te faaherehere i to tāua,
Ta na poihere te arōfa māòhi.
Ta na fatu to tāua hanahana,
Ta na tiàmā to tāua tura.
Nā ô mai òe, nā ô nei atu vau,
Nā ô mai terā, nā ô atu terā aè,
Ua hono anaè ia i te mana tupuna.
A òre te haamā, a òre te piò,
A òre ke tīpee,
Tāòto ihoā, tāmāa ihoā, e ora ihoā !
Le SPAA remercie les Editions Haere Po, TFNT et la famille de Henri Hiro.
