N°111 – Te Haakakai o Akaui

 

Te Fare Manahaakaui1

 

Véronique Mu, vaana e Karl Von Den Steinen me Henri Lavondès.

Toti Teikiehuupo

 

E haakakai tēnei no te hakaìte e aha te hana i tupu, ma hope o tītahi haaūpahiìa, meìa i te vaiumu i tihe ai io tītahi hakatu hana pūpūkina. O Akaui, e hakaìki me i Hiva Oa i te Kaavai o Hanapaaoa, ua hano e haaâvei me Toaketini me i Ua Pou. Vāana e te apuuìa manihii i te Henua Enana, e kāneaìa tītahi kaiìa mau kaùoo, e puaka te kai i haapeìa e Toaketini. Ua tuku atu īa i te hope mōmona o te puaka na ta īa manihii, a tika a ua kaiìa tītahi paka.

No tēnei hana hei koè i ìteìa e Akaui, ua haakau mai īa me io to īa motu i ta īa puaka karaihā o Makaiaanui te ikoa. Ua taoìa hua mākā puaka nei io he umu èpo, atika a i te ava o te kaiìa mau a īa i haapei mai, àè īa i tuku atu i te upoko na to īa hoa apuu. No te haahua i tēnei hana teka, ua pōpahi Toaketini i nā moî o ta īa toa o Pahuatiti, e noho aa io he murere, e mimi io te ipu kava a Akaui. Ua peàu atu Akaui i ta īa mou toa e hano i te tau keâ me io tītahi toa òko nui me i Hiva Oa no te maka.

Ma te oìoì, i to âua huaìa mai, ua ape Akaui e tahi ipu kava. Aì tevee, ua eke nā moî io to âua mūrere no te mimi io he ipu kava a Akaui. Ohia a ua pei nā toa e tataì aa, me te maka i nā keâ. Ua vii pōhue nā moî, mate nui.

You may also like...